مفاجات جديدة كشفت عنها التحقيقات في قضية أنوش، بعد القبض عليها بتهمة الفسق والفجور، وإبراز مفاتنها مصحوبة بعبارات وتلميحات وإيحاءات جنسية قاصدة الإغراء.
استدعت جهات التحقيق نبوية أنوش وجاءت أقوالها كالآتي: أنا اخترت اليوميات وأسرار مطبخ بس كان عندي تحفظ على اليوميات، لأن الستات فيها كانت بتطلع بشكل شبه عريانة، فأنا قولت اشتغل في اليوميات بحرص لأنها بتجيب مشاهدات أكثر من قنوات الطبخ، وأكون واخدة بالي من لبسي وما أبينش أجزاء من جسمي، فأنشأت 3 صفحات على اليوتيوب، وأول صفحة اسمها عالم نشوى، وأنا اللي قمت بإدارتها في شهر 11 لسنة 2021، وأنا كنت فيها بطبخ أكلات عادية، وأنشأت الصفحة ديه عشان أزود دخلي لأني قاعدة في البيت وكنت عايزة حاجة تشغلني بعد وفاة بنتي.
وتابعت المتهمة نبوية أنوش: قفلت الصفحة ولغتها خالص وقعدت أتابع الستات بتاعة اليوميات، وقفلتها بعديها بحوالي 3 شهور لما لقيت نفسي مبكسبش فلوس وبعد ما تابعتهم لقيتهم بيعملوا روتين قبيح وجنسي، ولقيتهم بيلبسوا لبس شفاف وخارج، وبيتكلموا بمياصة أكتر من اللازم، ويقعدوا يقولوا خش في الانتساب عشان تشوف اللي مشفتوش عند حد، والانتساب ده عبارة عن أن شخص يكون عنده صفحة فيها أكثر من خمسين ألف مشترك، ومن خلال نسب الاشتراك في الصفحة بتتفعل ميزة الانتساب من إدارة اليوتيوب والناس تقدر تخش في حالة إعلان عن وجود غرفة مغلقة، وهي إني أحط صورة تكون ملفتة فالناس تخش مقابل إنها تدفع فلوس عشان تشوف الفيديو اللي محدش هيشوفه غيرهم.
وأضافت أنوش في اعترافاتها: الربح اللي كان بيجيلي من خلال الانتساب كانت بتبقى فلوس بتتدفع لإدارة اليوتيوب وبياخد منها 60% و40٪ من اللي متفعله خاصية الانتساب، بعدها أنا قررت أعمل صفحة أسميها يوميات أنوش، وأنا اللي اشتريت الصفحة دي، من واحد اسمه أيمن.م، لأن هو عنده قنوات تعليمية وشروحات وبينشأ صفحات، وأنا اشترتها بـ 220 جنيها، وهي كان فيها ألف مشترك وأربع آلاف نسب مشاهدة، ده كان الحد الأدني عشان أعرف أكسب منها فلوس علطول عشان اشتراطات اليوتيوب، وسميتها يوميات أنوش، وده كان في شهر فبراير 2022، وكنت بقدم عليها يوميات.
