نشبت مشادة حديثية بين إكرامي الشحات نجم الأهلي السابق، وإبراهيم سعيد لاعب القلعة الحمراء السابق، عن رحيله عن الأحمر على شاشة التلفزيون ومواقع التواصل الاجتماعي.
وهاجم إكرامي الشحات إبراهيم سعيد في تصريحات تلفزيونية، بسبب تصرفاته وعقده مع الأهلي وأسباب رحيله عن القلعة الحمراء، وخرج لاعب الأهلي السابق في فيديو يرد على حارس مرمى الأحمر السابق ليشتد الخلاف بينهم.
ويستعرض لكم “الحكاية” تصريحات الثنائي التي أصبحت حديث التواصل الاجتماعي
تصريحات إكرامي
وقال إكرامي في تصريحات تلفزيونية: “أنا عاوز أقول لإبراهيم سعيد، أنا كنت سببًا في رحيلك عن الأهلي ليه؟ أنت بتقول عقدك كان 350 ألف جنيه وأنا خفضته إلى 200 ألف جنيه.. والكلام ده مش مظبوط, في الوقت اللي كنا بنجدد فيه عقد إبراهيم، مكانش في كل المبالغ دي خالص في أي نادٍ في مصر”.
وأضاف: “الراحل ثابت البطل، كنا في غانا، وكان الأهلي يرغب في تجديد التعاقد مع إبراهيم سعيد ومحمد جودة، ثابت البطل قالي أقعد مع اللاعيبة شوف قصتهم إيه، وقعدت مع اللاعيبة عندي في الأوضة مش أنا اللي رحتلهم الأوضة في الفندق زي مقال إبراهيم”.
وتابع: “إبراهيم سعيد بيقول أي كلام، المبلغ اللي معروض من الأهلي كان 75 ألف جنيه، إبراهيم سعيد طلب 100 ألف جنيه في الموسم قولتله القرار مش بتاعي، هرجع لصاحب القرار”.
واختتم: “خلصت القعدة روحت لثابت البطل قولتله إن إبراهيم سعيد طلب 100 ألف جنيه، قالي لما نرجع مصر، أنا مهمتي انتهت لحد كده، و معرفش اللي حصل بينه وبين ثابت البطل بعد كده”.
تصريحات إبراهيم سعيد
ورد إبراهيم سعيد على إكرامي، حيث قال: “في مرحلة الناشئين أنا قعدت بلعب بعقد لمدة خمس سنين كناشئ، في الوقت دا كنت بتمنى أخد 30 ألف في الموسم، فلو زي ما أنت قولت إني لو اتعرض عليا 75 ألف كنت هوافق ومضيت ولا كنت هروح بلجيكا
وتابع: “أنت بتقول يا كابتن إكرامي إن في الفترة دي مكنش في الأرقام دي, لا يا كابتن أنا كنت ماضي بـ350 ألف جنيه حتي مكتوب في الـ CV بتاعي أغلي لاعب في مصر يتخطي العقد بتاعه المليون جنيه إبراهيم سعيد
وواصل: “يا كابتن إكرامي في الوقت الي أنت كنت بتتفاوض معايا فيه كنت في البرتغال ساعتها مع مستر أوليفيرا أنت عرضت عليا 200 ألف جنيه وأنا كنت فاكر إن المبلغ دا في السنة.. لكن بناءً علي كلامك إنه في 3 سنين؟ دي مصيبة”.
وأضاف: “كابتن إكرامي أنت عملت مصيبة أنت عملت كارثة أنت دمرتلي حياتي.. أنا مكنتش عايز أسيب النادي الأهلي ولا لحظة.. الأهم بقا أنت وصلت إيه لإدارة النادي في الوقت دا إنه يتقلب عليا القلبه دي؟, أنت حضرتك مفكرتش في يوم من الأيام إن أنت عندك أولاد؟ لأن أنا بعد القعدة معاك أنا شوفت أيام ما يعلم بيها إلا ربنا”.
وواصل: “كابتن ثابت كنت أنا ابنه كان بيشوفني يديني ضهره, كابتن صالح سليم كنت انا الابن المدلل ليه كان زعلان مني ومبيتكلمش معايا, كابتن حسن حمدي مكنش متقبل إنه يقعد معايا, كابتن الخطيب مكنش متقبل إنه يقعد معايا, حتى الأستاذ عدلي القيعي قبل ما أمضي للزمالك مكنش متقبلني”.
وأتم: “السؤال دلوقتي أنت حضرتك وصلت للإدارة إيه؟ لأن اللي أنت بتقوله دا كارثة.. انك تتكلم معايا في 200 ألف جنيه في 3 سنين وتقول إن الأرقام دي مكنتش موجوده؟ لا كانت موجودة بس أنت اللي مكنتش متابع”.
واختتم إبراهيم سعيد: “حرام عليك يا كابتن إكرامي.. الحمدلله إنه بعد 18 سنة بيتضحلي الرؤية إن أنا فعلا مكنتش عايز أسيب النادي الأهلي, واللي كان بيوصل للناس أنت وصلت حجات؟ الله يسامحك يا كابتن إكرامي.. أنا عايز أعرف أنت بلغت إيه للادارة بعد القعدة معاك”.
