الرئيس السيسي: معندناش مشكلة في الدولار.. عاوز أطمنكم على الأوضاع في الداخل مرت على مصر ظروف أصعب والشعب تجاوزها بصبر وعزيمة

طمأن الرئيس عبدالفتاح السيسي المصريين، خلال كلمة له اليوم الخميس 19 يناير 2023، أمام طلبة الأكاديمية العسكرية، أثناء زيارته الكلية الحربية فجر اليوم.

السيسي: مرت على مصر ظروف أصعب والشعب تجاوزها بصبر وعزيمة

وقال الرئيس السيسي: “عاوز أطمنكم على الأوضاع في الداخل .. صحيح بنمر بظروف صعبة جدا زى ما كل الدول تقريبا بتمر بده ..وده أمر مصنعنهوش بأنفسنا ..وقلت إن إحنا مدخلناش في حروب واقتتال ضيعنا فيه قدرات الدولة المصرية ومستقبلها .. لا .. معملناش كده .. أحنا كنا حريصين في كل ردود أفعالنا أن تتسم بالتوازن والحكمة في التعامل مع كل المشاكل اللى بتقابلنا”.

وأضاف: “حتى موضوع الإرهاب فرض علينا فرضا، وحرصنا من أول يوم في 2013 و 2014 أنه ميحصلش أى شكل من أشكال الصراع والاقتتال لكن كان لازم نجابه هذا الاختيار”، مشددا على أن الدولة تبذل جهدا كبيرا جدا للحفاظ على قدراتها، معلقا: “نقدر كلنا بالصبر.. ولازم نفهم أن ما نحن فيه هو نتاج ظروف أحنا مش سبب فيها، ولكنها ظروف دولية صعبة لها تداعيات كبيرة جدا على العالم كله، وأثرت كتير جدا على تكلفة الحياة سواء طاقة وسلع أساسية ومستلزمات إنتاج، والأسعار كلها ارتفعت في الدنيا كلها”.

وتابع الرئيس: “عندما يتساوي دخل الدولة من الدولار ومصروفها من الدولار الأمور هتبقا أحسن من كده، وده جهد بنبذله وقلت محتاجين نتحرك بسرعة ميبقاش عندنا حجم أكبر من اللى أحنا محتاجينه.. حجم الصادرات 50 مليار دولار طيب ده كفاية؟ لا مش كفاية.. بقول للشعب المصري كله .. بنعاني .. لكن الحمد لله عايشين وهنقدر نعيش وياما مرت على مصر ظروف أصعب من كده والشعب المصري بعزيمته وصبره وفهمه قدر يتجاوز الظروف دى وإن شاء الله هنتجاوزها”.

الرئيس السيسي: ما تحقق خلال الـ 10 سنوات الماضية حافز كبير وفخر لنا جميعًا

قال الرئيس عبدالفتاح السيسي، إن ما تحقق خلال العشر سنوات الماضية أمرا عظيما جدا ونفتخر به جميعا، مضيفا: “نشكر بيه ربنا سبحانه وتعالى انه حققلنا النجاح ده.. يا ترى ده حافز لينا؟ .. نعم ودافع لينا نكون جاهزين أكثر لحماية بلدنا”.

أضاف الرئيس السيسي خلال كلمته أمام طلبة الكلية الحربية: “كل ما القوات المسلحة ومؤسسات الدولة المصرية قوية هتقدر تجابه التحديات المختلفة ، واذا فرض عليها التحدي لا بقدراتها تمنع التحدى من الأصل.. فعندما تكون قادرا قويا مستعدا صدقوني ده تمن كبير قوي لمنع الصراع من أصله لأن العملية حسابية فاذا كانت الدولة قوية وقادرة بيمنع كتير من الشرور”.

السيسي: معندناش مشكلة في الدولار

وتطرق الرئيس عبدالفتاح السيسي، خلال كلمته أمامن طلبة الكلية الحربية اليوم الخميس 19 يناير 2023، لأزمة الدولار قائلا: “كان فيه مشكلة كبيرة في الدولار خلال الـ 3 أشهر الماضية ، لكن بقول للناس وعدنا إنه خلال شهرين هننهي تكدس البضائع في الموانئ ، وانهينا جزء كبير منها ومعندناش مشكلة في الدولار”.

وأكد: “كل محنة بتمر علينا بفضل الله بتتحول الى منحة بالإرادة والعمل والامل ان احنا نقدر نتجاوز اى مسالة بفض الله سبحانه وتعالى”.

وقال: “القوات المسلحة بتقوم بدور مهم جدا في الفترة الصعبة دي للتخفيف على الناس البسيطة واللى ظروفها صعبة والاسعار قاسية عليها بتوزع 3 مليون كرتونة لغاية شهر رمضان للتخفيف ما امكن عن كاهل المواطنين.

وأضاف الرئيس السيسي: “الأمور الحمد لله رغم انها صعبة لكن مسيطرين عليها وهنقدر نتجاوزها ومع بعض كلنا على قلب رجل واحد كل المصريين هنقدر نتغلب ونتجاوز الفترة دي..كل ظروف صعبة بتمر على اى دولة هو اختبار لقدرة الدولة وبتبقا اختبارات لكشف المعادن على كل المستويات الداخلية والخارجية ومعادن الدنيا كلها بتظهر في الازمة وفرصة نتعرف على قدراتنا في التحمل.

الرئيس السيسي: القوات المسلحة والشرطة نجحوا فى تأمين الدولة المصرية

وقال الرئيس خلال كلمته إن القوات المسلحة بالتعاون مع الشرطة تحقيق نجاح كبير في تامين الدولة المصرية، مضيفا: “بفضل الله بالتعاون مع الشرطة إن شاء الله حققت نجاح كبير قوى في تأمين الدولة المصرية بما فيها المنطقة اللى بذلنا فيها تضحيات كبيرة جدا خلال 9 سنين، شهداء سقطوا وحماة للدولة المصرية وللشعب المصرى”.

وأضاف: “حققنا نجاحا كبيرا قويا وقريبا بفضل الله سبحانه وتعالى نعلن أن الموجة اللى قابلتها مصر خلال العشر سنين الأخيرة تم الانتهاء منها والسيطرة عليها، اوعا تفتكر ان النجاح بيجي من غير عمل وصبر وتضحية مفيش حاجة كده.. خلال السنوات الماضية قدمت الدولة المصرية من خلال أبنائها من الجيش والشرطة والمدنيين تضحيات كبيرة جدا سواء شهداء ومصابين وتكلفة مالية”.

أكمل الرئيس: “بهنى القوات المسلحة والشرطة والدولة المصرية لأن الحمد لله حققنا إنجازا كبيرا في هذا المجال”.