قالت الفنانة نيللي، إن أكثر عمل له مكانه كبيرة من أعمالها التى قدمتها خلال مسيرتها، وتابعت:” أنا دايما فاكرة فيلم (العذاب امرأة) لأني أنا وقتها اللي صممت أختار الدور اللى قدمته، وقتها كان في دورين وقررت أختار دور السيدة الشريرة ورفضت تقديم الدور اللى له مساحة أكبر وعملت شخصية الست اللى مش طيبة”.
ووجهت الفنانة القديرة نيللى، نصيحة هامة لكل السيدات، قائلة: “بقول لكل الستات لازم نسامح، التسامح بيحقق رضا النفس، والرضا هيخلق السعادة، واننا منبصش للحاجات الوحشة ونبص للحاجات الحلوة عشان نكون سعداء فى حياتنا”، مؤكدة أن الحب يجعل المرأة “منورة” ويؤثر على حياتها بشكل إيجابي.
وتابعت:”يا بخت من زار وخفف، والله أنا عملت كل حاجة واستمتعت كثيراً بأدواري اللي قدمتها، أنا بحب الشخصية الفرعونية وكنت أحب أقدمها عشان رقبتي طويلة زي رقبتها، وأنا بحب نفرتيتيي وحاطه صورتها عندي”.
وأشادت نيللى بالممثلين والممثلات الشابات من الجيل الجديد، قائلة: “أنا بحب الجديد دايما، لأنه حاجة بتدي أمل في الحياة، وبحب دنيا سمير غانم جدا، وهى تقدر تقدم الفوازير لأنها موهوبة”.
