قال الإعلامي عمرو أديب، إن جشع التجار هو السبب الرئيسي في ارتفاع أسعار السلع بشكل مبالغ فيه، وتابع:” فيه ناس عاوزة تمص دمنا.. وسؤالي اللي مش لاقي له إجابة لماذا يستمر ارتفاع الأسعار؟ نتحدث عن سعر العلف والسكر والأرز والبيض، لماذا يزيد؟”.
وأضاف “أديب”، خلال تقديمه لبرنامج “الحكاية”، والمُذاع عبر قناة إم بي سي مصر، قائلا:” اللي بيجرى في السوق ده هيبوظه والسلع هترطرط، حتى الطبقات الغنية بتتكلم عن الأسعار.. الناس انكوت بغلاء الأسعار، والأسعار بهدلت الناس، عندك شعب صابر وبيستحمل وبيحاول يتصرف، متدوسش أكتر من كدة”.
وتابع:” الأول كنت فاهمك الدولار والزيادة تحت أمرك، لكن لماذا تزداد أسعار السلع بشكل مستمر؟ ما الآليات في السوق التي تؤدي لارتفاع الفول والعدس؟ هنا دخلنا في اللامعقول والأشياء اللي ملهاش معنى، اللي بيجرا في السوق بيبوظه أكثر”، محذرا من الوصول لمرحلة وجود المنج ولكن لا أحد يشتريها، قائلا:” هنوصل لمرحلة السلع موجودة ومحدش بيشتريها”.
ووجه رسالة للتجار قائلا: “هتخرموا السوق من الطرفين اللي بيبع واللي بيشتري، ايه اخرة الجشع ده، تعاونوا معانا نعمل حركة رخمة ونقول خلّوا رزّكم ليكم ونستورد من برة.. أنا بقولكم مكسب وخسارة مجبتش سيرة الضمير، انتوا باصين تحت رجليكم والنتائج مش هتكون كويسة انتوا بتلعبوا بالنار”.
