وجه الفنان أحمد العوضي رسائل مؤثرة لزوجته ياسمين عبدالعزيز أثناء تواجدها بغرفة العناية المركزة بإحدى مستشفيات القاهرة، بعد إجرائها لعملية جراحية خطيرة.
وكتب العوضي عبر حسابه الشخصي بموقع التواصل الاجتماعي فيس بوك: “يمكن ببان قدامكم دايما قوي.. لكن الحقيقه انا دلوقتي اضعف إنسان علي وجه الأرض عشان أنا روحي مش معايا.. أنا ضعيف جدا من غيرك إنتي لازم تبقي كويسة ولازم تقومي بالسلامة”.
وتابع:” أنا لأول مرة أكتب من غير ما أكون مفكر أنا بكتب إيه وهكتب إيه.. بس إنتي هتقومي إن شاء الله بإذن الله عشان إنتي وعداني وعد وهاتتفذيه.. أنا عاوزك تبقي كويسة وتقومي عشان أقولك إني لو كنت ببينلك إني بحبك مرة فالحقيقي واللي جوايا إني بحبك ألف مرة.. وأنا دلوقتي مش قوي زي ما إنتي بتشوفيني أنا دلوقتي ضعيف ضعيف جدا.. لحد ما تقوميلي تاني عشان زي ما إنتي بتاخدي قوتك مني أنا كمان باخد قوتي منك”.
وأضاف:” قومي عشان أنا بحبك.. بحبك أكتر بكتيير من كل الكلام اللي أنا كتبته.. أكثر بكتير من كل اللي عدينا بيه مع بعض من أيام حلوة ومواقف صعبة مرت علينا.. أكتر بكتير حتي من الموقف اللي إحنا فيه دلوقتي.. أنا بحبك، ادعولها تقوم بالسلامة زي ما انتو دايما بتدعولها بالنجاح والتوفيق.. هي دلوقتي محتاجه دعواتكم”.
الجدير بالذكر أن آخر عمل فني جمع الثنائي العوضي وياسمين كان في دراما رمضان الماضي بمسلسل “اللي مالوش كبير”، بطولة أحمد العوضي، ياسمين عبدالعزيز، دينا فؤاد، بدرية طلبة، خالد الصاوي، فتوح أحمد، ايمان السيد، من تأليف عمرو محمود يس، وإخراج مصطفى فكري.
