هاجمت الفنانة حلا شيحة الفنان الشاب تامر حسني، وطالبته بالتوبة بعد ظهور كليب جديد جمع بينها وبين تامر حسني من كواليس فيلمهما الأخير “مش أنا”، الذي تبرأت منه وقالت في منشور عبر موقع انستجرام:” أنا اتفاجئت جدًا بنزول كليب يجمع فيه مشاهد متفرقة من الفيلم، خصوصا بعد آخر بوست نزلته ووضحت فيه أنا إيه.. واتفاجئت أكتر خصوصًا بعد وعد تامر حسني ليا وتأكيده أنه حیحترم رغبتي وبعض الطلبات اللي طلبتها منه بكل احترام وود الصيف اللي فات، وأکدلي إنه حيحترم رغبتي”.
وأضافت:” “إحنا يمكن نجحنا بمقاييس الدنيا بس صدقوني بمقایيس ربنا إحنا لم ولن ننجح، أنا عارفة ومتأكدة إن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح بتكلم من قلبي، الكليب ده مايرضيش ربنا وأنا عيطت لأني شفت نفسي في المشاهد دي .. دي كانت زلة نتيجة ظروف مريت بيها وكلنا بنغلط ولازم نغلط علشان إحنا بشر بس المصيبة إننا بنغفل وبننسی”.
وتابعت:” “أنا مش حتكسف من حد.. أنا تبت من المشاهد دي وهي وهي لا تصح وأنا غلطت وبصلح وأهم حاجة إن ربنا يرضى عني لأن في الآخر ده اللي حينفعنا مش الشهرة ولا النجاح لا هو مش نجاح أصلًا علشان النجاح الحقيقي حاجة تانية خالص إحنا أغلبنا ناسينها إلا القليلين منا الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن”.
واختتمت: “إحنا كلنا عندنا امتحان في الدنيا دي وحابة أفكرك بالفيديو ده یا تامر اللي قولت فيه أنا مش بتمني أموت وأنا مطرب أنا دايما خايف کده.. كلام أكيد قولته في لحظة صدق جواك وجوانا كلنا من شوفه تاني يمكن يفكرك أن جواك أكيد في صراع وأنا وكلنا كلنا بنغلط بس المهم في الآخر نتدارك الغلط و نصلح .{إلا من تاب وآمن عمل عملًا صالحًا أولئك يبدل الله سيئاتهم حسن وكان الله غفورًا رحيمًا.. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد”.
الجدير بالذكر أن الفنانة حلا شيحا قامت مؤخرا باعلان اعتزامها الابتعاد عن الفن وارتداء الحجاب مرة أخرى بعد زواجها من الداعية الاسلامي معز مسعود كما رفضت العروض الخاصة للعمل ولم تشارك في الحملة الترويجية له خلال الفترة الماضية، كما قامت بإلغاء متابعتها للفنان تامر حسني عبر حسابها الرسمي على موقع التواصل الاجتماعي إنستجرام.
