قرر المطرب الشاب خالد الفايد نجم ذا فويس كيدز الاعتزال مجددا، وأعلن خبر اعتزاله عبر مواقع التواصل الاجتماعي يشارك جمهوره بهذا القرار.
وكتب خالد على صفحته الشخصية بموقع التواصل الاجتماعي فيس بوك: “أولا وبدون مقدمات أنا هعتزل السوشيال ميديا فتره مؤقتة لحد ما أكون مؤهل إن أنا اتعامل مع الناس بطبيعتي مره تانيه، ولكل حد أنا شتمته او نزلت بوست عليه وتعديت حدودي كشاب لسه بيبدأ وبيقول بسم الله في المجال من هنا ورايح كلامي من غير شتايم ولا تقليل من اي شخص.
وتابع: هلتزم في الچيم واتمرن كويس هبدأ أتعلم من أخطائي اللي فاتت وهحاول مكررهاش دا اخر بوست ليا الفتره دي ومش هبدء انزل بوستات الا لما الاقي نتيجة من كلامي دا واحس ان بدأت ابقي شخصية ايجابية ومؤثرة بفني الكويس وشكرا لكل اللي دعموني ووقفوا جمبي بجد بحبكم.
خالد الفايد
وجه الفنان الشاب المعتزل خالد الفايد اعتذارا للملحن هاني محروس، وعلق من خلال منشور له قائلا: ربنا يبعد عنكم أي حد يستغلكم ويضحك عليكم باسم الدين.
ونشر الفايد منشورًا عبر حسابه الرسمي بـ فيس بوك جاء فيه: أكبر غلطة عملتها في حياتي إني سمعت كلام الناس.. وكنت مخلص من قلبي، لكن شفت منهم عكس كدا.. وربنا يكفيكم شر اللعب في الودن والكلام الفارغ.
وأضاف خالد الفايد: ربنا يبعد عنكم أي حد بيستغلكم ويضحك عليكم باسم الدين.. ربنا يبعد عنكم أي حد عامل فيها مولانا، صدقوني في حاجات مش هقدر اشرحها ليكم.
وأضاف: ومش هقدر أقول غير إني اتسرعت وغلطت في هاني محروس غلط كبير بسبب إني إديت ودني للناس وسيبتهم يتكلموا ويولعوا براحتهم، أوعى تسلم ودنك لحد وتخليه يبخ فيها سموم.. ده درس اتعلمته حبيت أوضحه علشان محدش يقع في نفس غلطتي.
وظهر خالد الفايد خلال فيديو عبر حسابه الرسمي بـ فيس بوك، معلقًا: حابب أقولكم إن أنا خالد وحسابي مش مسروق، وأي حد في الدنيا من حقه يعمل الحاجة اللي بيحبها، ومن حقه ينام ويقوم مرتاح نفسيًا.. مش أذي حد مش واكل حق حد مش مضايق حد، كل واحد من حقه يعمل اللي عايزه بدال مش بيأذي حد، ليه الواحد يضايق على نفسه خلوها على الله وسبوها.
