علق الإعلامي خالد ميري، على أداء المنتخب الوطنى لكرة القدم، فى بطولة الأمم الافريقية، قائلاً:”الكرة كلمة السر في كل بيت بمصر، ومنتخب مصر اللي حيرنا معه وتعبنا وكيروش اللي مش عايز يدخل قلوب المصريين.. لكن المهم إننا وصلنا دور الـ16 ومش مهم هنواجه مين..بصراحة الـ 3 ماتشات كانوا غير مبشرين لكن مش وقت الحساب”.
وأضاف “ميرى”، خلال تقديمه برنامج “كلمة السر”، عبر قناة “صدى البلد”،:”عندنا لاعيبة كبار والفرصة بس المهم ترجع الروح، وده مش وقت حساب، خلينا نشجع ونقف وراء منتخب مصر عشان نعدي دور الـ16 وبعد كدا كل الأماني ممكنة ووارد جدا نرجع بكأس أمم إفريقيا.. هي دي مصر الكبيرة، وفي كأس أمم إفريقيا مصر مكانها الطبيعي أنها تبقى في النهائي”.
وأردف “ميرى”،:”يمكن كيروش أخدنا للبطولة الإفريقية بنفس تجربة كأس العرب على اعتبار أن مصر مش رايحة تنافس.. لا مصر بتنافس وكل المصريين بيحبوا الكرة ومنتخب مصر عنده فرصة وصلاح كمان عنده فرصة، وزعلنا إنه مدخلش التشكيلة المثالية في الفيفا وواضح إن العرب بعدم اخيارهم أثروا عليه”.
