كتبت – أوركيد سامي:
أعربت الفنانة دنيا سمير غانم، عن بالغ سعادتها بتكريم الفنانة الكبيرة نيللي، في مهرجان القاهرة السينمائي.
وقالت دنيا سمير غانم، عبر صفحتها الرسمية على موقع التواصل الاجتماعي :” الايقونه العظيمه نيللي الف مبروك تكريمك في مهرجان القاهره السينمائي الدولي أسعدتي الوطن العربي كله بجمالك و روحك الطفوليه الدائمه ما شاء الله و رشاقتك و أناقتك”.
وتابعت :” لما اتسالتي مين اكتر حد بيضحك فقولتي سمير غانم طبعا اثرتي فيا جدا و ابتسمت و بكيت في نفس الوقت لكن حسيت بأنه هيفضل موجود جوانا كلنا بأعماله و بروحه المبهجة ربنا يرحمه يارب بشكرك اني خلتينا نشوفك نورتي الدنيا و كنتي وحشانا اوي”.
و أضافت :” أما عن الفنان الراقي جدا سمير صبري ابهرتناج بحضورك و خفه دمك كالعاده و حبك و دعمك الدائم لزملاءك من كل الأجيال، يمكن دي معلومه ناس كتير مايعرفوهاش و هي اني اول مره غنيت في انترفيو في حياتي كان مع استاذ سمير صبري في برنامجه الذي لم يتكرر هذا المساء بردو غنيت و من الحلقه دي شافني الاستاذ المؤلف مجدي صابر و المخرج العملاق محمد فاضل و مثلت في مسلسل للعدله وجوه كتيره مع استاذنا كلنا النجم يحيي الفخراني و أعظم ام و فنانه النجمه دلال عبد العزيز و القديره رجاء الجداوي الي عمرنا ما هننساها ربنا يرحمهم يارب ؛ و زميلي العزير جدا احمد زاهر و مجموعة كبيرة من النجوم الي اتشرفت بالعمل معاهم في بداية مشواري الفني”.
و تابعت اسفه اني بطول عليكم و لكن استحملوني في المرحلة دي في حياتي اتعلمت لو حسيت إحساس صادق ناحيه اي حد إني اعبر عنه فورا لان ده شئ هيسعدني انا اولا قبل ما يسعده، شكرا للجمهور العظيم الي بيستحملني و بيستحمل مشاعري لانهم اهلي ” .
