رسائل هامة للرئيس السيسي في يوم الشهيد| مؤامرة سيناء ظهرت منذ يناير 2011.. الحرب على الإرهاب أشرس من الحروب التقليدية.. وهنعمل معرض لفضح ممارساتهم وأسمائهم

شهد الرئيس عبدالفتاح السيسى، اليوم الخميس 9 مارس بيوم الشهيد، الذي أقامته القوات المسلحة تخليدا لأرواح الشهداء والتذكير بالتضحيات التى قاموا بها فى سبيل الحفاظ على الوطن.

وخلال الاحتفالية، شاهد الرئيس السيسي فيلم تسجيلى عن تضحيات القوات المسلحة، خلال فعاليات الندوة التثقيفية الـ37 للقوات المسلحة، احتفالا بيوم الشهيد، وأثناء عرض الفيلم التسجيلى، وقف الرئيس عبدالفتاح السيسى، والحضور، لتحية الشهداء.

وتحتفل القوات المسلحة يوم 9 مارس من كل عام بيوم الشهيد، مع ذكرى استشهاد الفريق أول عبد المنعم رياض 1969 والذى ضرب أروع مثال على التواجد فى خط المواجهة فكان دائما فى الصفوف الأمامية تأكيدًا على تلاحم القائد مع جنوده فى الميدان.

كلمة الرئيس السيسي في يوم الشهيد

ألقى الرئيس عبد الفتاح السيسي، كلمة في نهاية فعاليات الندوة التثقيفية الـ 37 للقوات المسلحة، قال فيها: “الحقيقة مش عارف اقرأ الكلمة ولا أقول مشاعرى وإحساسي باليوم ده، عاوز أقول أنا من الناس اللى حضرت الأحداث وشافتها وهى بتتعمل وبتترتب بشكل أو بآخر، وزى ما أنتوا شوفتوا الاحتفال كله وكل البرنامج النهاردة يعكس حاجة واحدة بس، إن مهما كانت الصعوبات اللى بتقالبنا والظروف الصعبة اللى بنواجهها بفضل الله الأمور بتعدى”.

وأضاف الرئيس السيسي خلال احتفالية يوم الشهيد: “فيه تمن كبير قوى اتدفع، والتمن ده فيه أسر.. دايما أقول أن تكرارى للكلام هو عرفان للأسر اللى موجودة معانا واللى مش موجودة .. أن التمن كبير جدا عندكم وعندنا كلنا .. عند كل المصريين اللى بيشفونا النهاردة بيحسوا قد إيه إن فيه تمن كبير اتدفع علشان البلد تبقا في أمن وسلام”.

الرئيس السيسي يشرح كيف بدأت مؤامرة سيناء

وروى الرئيس عبدالفتاح السيسي بعض كواليس مناقشة الوضع الأمني في سيناء منذ 200 – 2009، قائلا: “كنت نائب مدير المخابرات في 2009 فكنا بنعمل لقاءات لمناقشة الوضع الأمني في سيناء فكانت اللقاءات بتتعمل وساعتها مدير المخابرات اللواء مراد موافي ، ورئيس جهاز أمن الدولة اللواء حسن عبدالرحمن، كنا بناقش الوضع، وكنا شايفين إن خلال 7 سنين اتشكلت بنية أساسية ضخمة فى شمال سيناء عبارة عن مخازن أسلحة وذخيرة ومفرقعات وأيضا بنية بشرية كبيرة للسيطرة”.

وتابع الرئيس السيسي: “كانوا ساعتها لو رجعتوا على مواقع التواصل هتشوفوا من 2008 و 2009 كان ليهم أفلام وعروض كأنهم خارج الدولة، وكان الكلام ساعتها إنه مشكلة كبيرة في سيناء والموجود هناك والكتلة اللى اتشكلت قبل 2005 بقت محتاجة جهد وعمل عسكرى كبير من الجيش والشرطة علشان نحل المسألة”.

وتحدث الرئيس عبد الفتاح السيسي، عن ظروف المواجهة مع الأوضاع والإرهاب في سيناء خلال عام 2011، قائلا: “قبل عام 2011 مش ما حصلش تدخل من الجيش والشرطة للتعامل مع الوضع هناك.. طبعا كان فيه ظروف واتفاقيات.. الموضوع أن القوات اللى موجودة شرطية محدودة.. وقوات الجيش على خط “أ” بس.. وفضل الموضوع كده.. وظهرت المؤامرة بأبعادها الكاملة في 2011.. والناس مشغولة في الميدان.. كان يتم تخريب تواجد الدولة المصرية هناك والقضاء عليه.. أقسام ومديريات وكل ما يتعلق بمصر.. واتعمل ولاية.. واتعمل قضاء شرعي على قد تعبيرهم يعنى.. وحاجات من هذا الأمر”.

السيسي: يوم 28 يناير 2011 خرجت الأمور عن السيطرة في سيناء

وتابع: “يوم 28 يناير عام 2011 بقت الأمور خارج السيطرة.. الله يرحمه سيادة المشير طنطاوي.. قولت له يا فندم.. ممكن يكون فيه مشكلة كبيرة جدا.. لو الأمر استمر كده.. ممكن يعملوا عمليات عبر الحدود ضد إسرائيل.. وإسرائيل ترد ويبقي صراع كبير ومشكلة كبيرة.. القرار من سيادة المشير الدخول بقوات.. وعملنا إجراءات مع إسرائيل لدخول القوات في العريش ورفح والشيخ زويد.. للسيطرة على الموقف هناك.. ده بسجلوا للتاريخ.. وفى إسرائيل تفهموا ده.. قالوا بس أدونا خبر بالقوات قد إيه.. ونسقوا معانا.. واستمرينا من الوقت ده لغاية دلوقتي.. يمكن حجم القوات اللى كان موجود خلال الـ 8-9 سنوات دول زادت علشان نتعامل مع التحديات اللى موجودة هناك.. وفى لقاء سابق قولت أوعى عينكم تغفل أو تنام على حاجة جوة مصر.. مش بس كده كمان انتبه أى حاجة ممكن تمسنا بره مصر”.

الرئيس السيسي يوجه رسالة للمصريين في يوم الشهيد

وفي هذا اليوم الذي تحيي فيه القوات المسلحة يوم الشهيد، وجه الرئيس عبد الفتاح السيسي رسالة إلى المصريين، قائلا: “مهم قوى مش رسالة للمصريين الطيبين بس.. حتى الأشرار.. لما حصل الكلام من سنين كنا بنقول إن الكلام ده هينتهى ومفيش إرهاب بيهد بلد.. لو كانت البلد على قلب رجل واحد.. فيه مقدرات وتكلفة غير الأرواح بتتقدم من البلد، لكن أكيد اليوم هيجيي وفيه نهاية إللى إحنا كنا بنشوفه قبل عشر سنين”.

وأضاف الرئيس السيسى: “خلوني أكلمكم كشاهد عيان، وهقول لكم علشان تعرفوا إن مفيش حاجة بتتعمل وليدة اللحظة.. ده فكر وخطة وترتيب وإجراءات بتتعمل علشان فى النهاية ندخل فى اللى إحنا دخلنا فيه العشر سنين اللى فاتت”.

وتحدث الرئيس عبد الفتاح السيسي، عن الحرب على الإرهاب، قائلا: “أنا بقولك دلوقتي في يوم زى كده.. فيه تمن كبير أوى أوى اتدفع بخلاف دم الشهداء والمصابين اللي اتصابوا.. بس أقول يا جماعة فيه ناس مش بتنام.. وفيه ناس بتموت وتستشهد علشان نبقي في سلام.. مهم أوي يشعروا أن التمن والتقدير من جانبنا كلنا كبير.. احنا مقدرين ده.. عاوزين نبقي أكثر صلابة.. أكثر من كده.. التحديات كبيرة.. بناء دولة واستعادة مكانتها في التعليم والصحة وفى كل شيء.. أمر مش بسيط.. محتاج جهد وتضحية.. وبدأت المعركة معاهم.. وكان كتير مننا يقول امتي تخلص.. كنا بفضل الله عارفين أنها هتخلص”.