حلت الفنانة الشابة أسماء جلال ضيفة ببرنامج “معكم” الذي تقدمه الإعلامية منى الشاذلي ويعرض على قناة أون.
حب من طرف واحد
وبسؤالها عن حياتها العاطفية قالت:” حبيت من طرف واحد، شخص كنت بحبه جدًا، وسنين كتير كنت بحبه بس هو مكانش عايزني بإرادته، هموت وأعرف هو فين دلوقتي، لترد عليها منى الشاذلي :”أكيد ندمان آخر حاجة”.
تشبيهها بمايكل جاكسون
وردت على على تشبيه البعض لها بالنجم العالمي مايكل جاكسون، وهل شعرت بالضيق من هذا ، قائلةً “الصورة لم تضايقني، أنا صاحبة مبدأ اللعبة الحلوة أصقف لها، لو حد قال إفيه حلو هصقف له ، مش عارفة إيه بداية الموضوع بس لقيت الدنيا كلها بتقول أسماء جاكسون أو مايكل جاكسون الغلابة وافتكرت ان عشان بحبه، وبعدين لقيت صورة بالذكاء الاصطناعي دمج صورتي في صورته، الصورة لذيذة بتضحك”.
فيلم ولاد رزق
وفي حديثها عن فيلم ولاد رزق 3 قالت :”أنا بحب الأجزاء اللي فاتت من ولاد رزق، ولما أستاذ طارق العريان كلمني تحمست جدًا، قلت له أنا موافقة أيا كان، وأنا كان دوري مع عمرو يوسف واشتغلت معاه قبل كده في مسرحية لذيذة أوي والطاقة بتاعته جميلة، وقعدنا نفكر طب الشخصية دي هتبقى رقاصة ولا مش رقاصة، قولت لأ مش عايزة، قال لي طب نصابة، قولتله ماشي أو رقاصة محترمة وفي الآخر قررنا أنها تبقى بتسرق بطاقات الائتمان من الناس ومش عارف ده بان ولا لأ وأعتقد أن في أكتر من حاجة اتشالت”.
وأشارت: “وأنا في الحقيقة غير الشخصية اللي في الفيلم خالص، ولو كل إنسان قعد يقول لنفسه أنا ذكي ومحدش يعرف يضحك عليا هو ممكن يتضحك عليه بسهولة، وما اتخدعتش في حد قبل كده وواخده احتياطي من اللي بيحصل حوالينا”.
الدريس كود
وتحدثت عن علاقتها بالمخرج شريف عرفة قائلةً:” شريف عرفة عنده دريس كود معين في اللبس سواء في اللوكيشن أو التصوير، هو بيتعامل مع الإستوديو إنه المكان اللي بننتمي له فلازم نحترمه زي اللي رايح شغله لازم يلبس حاجة مناسبة، ما ينفعش تيجي بشورت أو شبشب”.
وتابعت:” “حتى لو الجو حار في الصحراء فيه دريس كود عند شريف عرفة لازم الممثلين والممثلات يلتزموا به، وفيه حد كان لابس شورت وحصل بلطافة إن الأستاذ منعه وقال له احنا متفقين ده ما ينفعش”.
واختتمت:” “أستاذ شريف عرفة اختارني في فيلم اللعب مع العيال أول أما شافني لإن رأى إني مناسبة للدور رغم إني ما بعرفش أتكلم اللهجة البدوية وخصص ليَّ حد يعلمني”
عشق الطفولة
كما تحدثت أسماء جلال عن حبها للنجم وائل جسار قائلةً “بحبه جدا.. كنت الشخصية الملزقة اللي بحط صوره في كل حتة، وبعدين الموضوع تطور وبقيت غريبة الأطوار جدا وبقيت أحضر حفلاته كلها”.
وأضافت “بقى لما يعمل حفلة أكون أول واحدة عارفه مكانها فين وأحجز ترابيزة كاملة ليا عشان أركز معاه، وكنت ألبس فستان حتى لو الناس حواليا لابسة عادي عشان يشوفني، مع إنه متجوز .. فمش فاهمة أنا كنت بعمل ايه”.
وتابعت: “طبعا ولا أخد باله مني خالص لحد ما في مرة أعتقد خاف مني وقتها، لأن روحت له كنت عاوزة أتصور معاه، فقلت له عارف إننا هنتجوز؟ قالي والله!!.. كنت صغيرة والله العظيم وقتها يا جماعة.. لسه بحبه بس مش بعمل زي زمان، وربنا يبارك له في مراته وولاده”.
موضوعات ذات صلة
بعد نجاحها في أشغال شاقة.. أسماء جلال تشارك أحمد حلمي في مسرحية ميمو
تابعونا على صفحات موقع الحكاية الرسمية
Elhekayah TV – تليفزيون الحكاية
