عمرو أديب لـ”محمود بدر”: ماتزعلش لو لم يتم ذكرك بمسلسل الاختيار أكيد مش مقصودة

أكد الإعلامي عمرو أديب، أن النائب محمود بدر، عضو مجلس النواب، كان أحد أَضلع حركة تمرد، والتي أطاحت بحكم الرئيس المعزول محمد مرسي، وتابع: “بدر ورفاقه دول كانوا حاطين رقبتهم على ايدهم لأنه كان ممكن في أي لحظة يتقطع، وكانوا بيدوروا عليه في الشوارع”.

وأضاف “أديب” في خلال تقديمه لبرنامجه “الحكاية” على فضائية “إم بي سي مصر 2″ اليوم السبت،:” أنا عاوز أطيب بخاطر النائب محمود بدر، ولما بقول نائب فأنا بكبره، إنما هو أخونا الصغير، اللي كان أحد أضلع حركة تمرد، هذا الشاب ورفاقه، كانوا حاطين رقبتهم على إيدهم، كان ممكن يتقطع أربع تربع في أي وقت، كانوا بيدوروا عليه في الشوارع، أنا لا بكبر ولا بصغر، كلنا عارفين اللي حصل واللي تمرد عملته، والاستمارات والتوكيلات، هما عملوا مجهود تاريخي”.

“وتابع:” محمود زعلان وله حق، إنه لم يتم ذكره في مسلسل الاختيار، عاوز أقول لمحمود أكيد ده شيء مش مقصود، وجايز يجي في الحلقات اللي بعد كدة، إنما محمود يكيفه أنه ألقى كلمة الشباب وتمرد عندما قامت الثورة، وده شيء مسجل مش محتاج مسلسل ولا عمل درامي، تمرد هنفضل كلنا فاكرينها وفاكرين دورها، ولما جه قالي قولتله همضي عالهوا، ومضينا عالهوا، ووقتها جالنا تبرعات وفلوس لندعم تمرد، وتمرد كان ضلع أساسي ورئيسي في 30 يونيه”.

وقال:” يا جماعة التاريخ هيفضل تاريخ، والحاجات اللي حصل حصل، والمفروض إن اللي بيعمل حاجة، في الغالب أنا عارف طبعا بيبقى الواحد بتصعب عليه نفسه، ومحمود قالك أنا عملت أنا فين، إنت في مكان جيد في التاريخ المصري المعاصر، محمود وهو معانا في القاهرة اليوم، كان وقتها صعب إنك تستضيف محمود وإنه يجي مدينة الإنتاج الإعلامي، وكان لا قدر الله لو حصل حاجة غلط في 30 يونيه، لو في 10 أسامي كانوا هيتلموا، كان منهم محمود بدر”.

وأضاف،:” على فكرة أنا ومحمود مش صحاب، أنا مش معايا نمرة تلفونه، بس الواحد بيحب يقول حاجة لو يقدر يقولها، حب محمود أو أكرهه، طبعا التار الإخوانجي مع محمود كبير، وهما اليومين اللي فاتوا بدأوا يسخنوا عليه، وقالوا أشرب يا عمي، لا ميشربش، اللي بيقوم بدور وطني مبيستناش مقابل، ولا يتقالوا برافو ومتشكر، ومحمود أكيد مش مستنى ده، وهو دلوقتي عضو مجلس نواب، بيخدم دايرته وبلده”.

وتابع:” أظن إن مسلسل عظيم من الاختيار فيه كم من التفاصيل اللي تخلي وارد جدا إن في تفاصيل تانية متظهرش، أنت عاوز 10 زي الاختيار ده كمان عشان تحكي التفاصيل”.