تفاعل عدد كبير من نجوم الفن والإعلام، مع واقعة عروس الإسماعيلية، التي تعرضت للتعدي بالضرب من زوجها قبل حفل زفافهما، معبرين عن استيائهم الشديدة من الواقعة ومن موقف الزوجة وموافقتها على استكمال الفرح.
وخلال السطور التالية، نرصد لكم أبرز تعليقات نجوم الفن والإعلام، على واقعة عروس الإسماعيلية.
رانيا يوسف: المجتمع بيخوّف الستات
وكتبت الفنانة رانيا يوسف على عبر حسابها الرسمي بموقع الصور والفيديو إنستجرام: لو الأهل بيحترموا ولادهم ومش بيضربوهم، مستحيل ولادهم يتقبلوا الضرب من حد تاني ويشوفوه شيء عادي، المجتمع اللي بيلوم الستات طول الوقت، هو اللي بيخوّف الستات تطلق.
ريهام سعيد لـ عروسة الإسماعيلية: أوعي تكملي
دعت الإعلامية ريهام سعيد عروس الإسماعيلية التي تعرضت للضرب من زوجها قبل حفل الزفاف، إلى عدم إكمال زيجتها حتى لا تستمر في القهر الذي يحدث لها، بحسب وصفها.
كتبت ريهام عبر حسابها الرسمي على موقع فيسبوك موجهة رسالتها إلى عروسة الإسماعيلية : ممكن تبقي يتيمة ومالكيش حد وممكن يبقى في حد بس ملوش لازمة، لأنك تكملي الجوازه دي يبقي مالكيش حد فعلا.
وتابعت: أوعي تغلطي غلطتي وتكملي في حاجة غلط من الأول، أنا حياتي بقت صعبة أوي بسبب قرار واحد غلط أخدته، عارفة ممكن يكون قالك إيه، بس إللي ما يحافظش على كرامتك يبقى مش بيحبك، اللي يرضى أنه يكسر بخاطرك في ليلة عمرك يبقى مش بيحس ولا بني آدم.
وأضافت: غلطتي وأتمنى تصلحي غلطتك ليكي رب اسمه الكريم عارفة الكلام عن الستر وبيتك وجوزك وإن مالكيش حد والفضيحة وماينفعش تطلقي بعد يوم من الجواز كل ده أي كلام.
وتابعت: اشتري نفسك وحياتك الناس مش هاتنفعك ربنا فضحه لحكمة عنده، أي ست خايفة وبتكمل حياة كلها مهانة وذل عشان مالهاش حد وخايفة من كلام الناس بقولك خلي عندك إيمان في اللي خلقك ربنا عمره ما هايسيبك.
وواصلت ريهام سعيد: غلطتي غلطة عمرك إنك كملتي وهايبقي غلط أكبر لو استمريتي، هايضربك تاني وتالت ورابع وهايضربك قدام عيالك، ليه؟ عشان الحب؟ فين هو ده؟.
وتابعت: ساعات في قرارات بتبقي صعبة أوي الواحد ياخدها بس لو نجح إنه ياخدها ويتحدى الناس والخوف هايشتري حياته اللي هايعيشها مرة واحدة بس.
واختتمت: أنتي مش لوحدك مصر كلها معاكي والقانون في ضهرك والله أنتي دلوقتي مش لوحدك، من خلال فيديو خلى ملايين معاكي وفي ضهرك هايدعموكي ويحموكي لو حد يعرفها يوصل لها البوست لازم ننقذها، وننقذ أي حد بيفرط في كرامته وحياته عشان خايف، على فكرة عينيكي في الصورة كلها كسرة وحسرة وإجبار مهما قلتي عينيكي بتتكلم.
مفيدة شيحة توجه رسالة لـ عروسة الإسماعيلية
أعربت الإعلامية مفيدة شيحة عن استائيها من رجوع عروسة الإسماعيلية إلى زوجها، خاصة بعد التعدي عليها بالضرب يوم الزفاف.
ونشرت شيحة صورة للعروسين، عبر حسابها الشخصي بموقع التواصل الاجتماعي فيسبوك، وعلقت قائلة: أول مرة أعلق على حاجة بس اسمحيلي أيتها العروسة الجميلة اللي إنتي عملتيه ده أكبر غلطة في حياتك.
أعربت الإعلامية سهير جودة عن استيائها الشديد من عودة عروسة الإسماعيلية إلى زوجها، وذلك بعد تعدي زوجها عليها بالضرب في يوم الزفاف.
وقالت جودة خلال تقديم برنامجها الستات الذي يذاع على شاشة النهار: الواقعة تدل على أن جزءا من المجتمع يعتبر العنف والضرب شيئا عاديا.
وأضافت: واضح أن الثقافة بتختلف من مكان لمكان، وأن في عرف سطوته أكبر بدليل أن حصل الصلح، واللي حصل غير مقبول والصلح مش دايمًا خير، والبنت اتكسر روحها.
عصام السقا لـ عريس الاسماعيلية: أنت واد دكر كده
ونشر الفنان عصام السقا، صورة للعريس، معلقا: أنت واد دكر كده.. عشان يثبت لأهله أنه راجل.. وهو معداش حتى من أمام شارع الرجولة، المقطع ده هيفضل وصمة عار هتلاحقك حتى ف أحلامك ي يا عم الدكر أنت.
وقالت المخرجة هالة خليل عن فيديو صلح العروسين، بعد اعتداء الزوج على زوجته يوم الزفاف: مشهد أكل الحمام ده مشهد مقزز.. كل الرجالة بتستعرض بوقاحة قدام الكاميرا وامرأة وحيدة محاطة بذراع وحش وعلى وجهها ابتسامة بلاستيكية تراقب المشهد في صمت ولم يطلب منها أحد أن تعبر عن نفسها ولو بجملة وحيدة.. أنا لو بخرج مشهد ذكوري فج مش هييجي على بالي المستوى ده.
أثارت واقعة عروس الإسماعيلية خلال الساعات الماضية، الجدل من خلال رواد مواقع التواصل الاجتماعي بسبب تداول فيديو لمشاجرة في الشارع بين عروسين.
وبدأت واقعة ضرب عروس الاسماعيلية بمشادة كلامية وتطورت لاشتباك بالأيدي ثم تبادل الضرب، وتدخل أقارب العروسين لتنتهي بإصابة العروس وسقوطها على الأرض.
وانتشر مقطع فيديو آخر كشف تصالح العروسين والعودة لمنزل الزوجية، وهو ما أثار غضب الكثير من متابعي مواقع التواصل الاجتماعي.
