لقاء الخميسي تثير الجدل بعد تصريحاتها الدينية:” أنا مسلمة بالوراثة ووالداتي مسيحية”

أثارت الفنانة لقاء الخميسي، الجدل حول حديثها عن كونها مسلمة بالوراثة، خلال الفترة الماضية، كما ظهرت في إحدى البرامج التليفزيونية، أمس الثلاثاء، مؤكدة على ذلك وأن هناك من يهاجمها من الجمهور بسبب آراءها الدينية.

لقــاء الخمــيسي: أنا مسلمة ووالدتي مسيحية

وكشفت لقاء الخميسي في تصريحات تليفزيونية:” أنا مسلمة، أبويا مسلم وأنا مسلمة، ومعنى كلمة مسلمة أني أسلمت قلبي لـ الله، كل واحد جواه ربنا، شايف ربنا إزاي ومعتنق ديانة إيه دي تخص كل واحد متخصش حد تاني، وأنا شايفة أن كل الأديان بتعرف ربنا، ووالدتي مسيحية، وأمي عمرها ما دخلتنا في القصة دي”.

لقــاء الخميــسي عن والدتها: أمي مسيحية وكانت بتصوم معانا

وتابعت لقاء الخميسي:” أمي مسيحية وكانت بتصوم معانا رمضان وتصحينا نصلي الفجر، هي بتصلي لـ ربنا بطريقتها وروحت معاها مرات كتير جدًا الكنسية وصليت، وهي نفس الصلاة لكن الطقس مختلف، والمسلم زي المسيحي زي اليهودي  والناس مش شايفة كده وكل واحد عنده أفكاره، أنا قرأت في التاريخ والدين كتير جدًا”.

واسترسلت لقاء الخميسي: مفيش فروق بين الأديان هو نفس الكلام، إحنا محتاجين نعرف ربنا، إحنا جزء من ربنا، مش بيقولك ونفخنا فيه من روحنا؟ الطبيعي نطلع مسلمين يعني أسلمنا قلبنا بـ الإله، يبقى كلنا زي بعض.

لـقاء الخميسـي: أنا مبسمعش شيوخ بتتكلم عن الدين

وأكدت لقاء الخميسي، أنها لا تستمع إلى الشيخ، قائلة:” الديانة الإبراهيمية هي الأساس لأن إبراهيم هو الأساس، والدين يتحدث عن الله واحد مفيش غيره والأديان مختلفوش، وقبل ما يبقى فيه إسلام في مصر كانت مسيحية وقبلها يهودية وبدخل عمرو بن العاص بقت مصر مسلمة”.

وقالت لقاء الخميسي: مبسمعش شيوخ بتتكلم عن الدين، ومبحبش أقول أنا مع مين وضد مين، ولكن بحب أسمع النقشبندي، أنا عشت في بلد مش محتاجة حد يشرحلي حاجة، ولما كنت في الإمارات التربية الدينية كانت جزء من المناهج ومدرسين الدين كانوا مصريين.

ونوهت لقاء الخميسي: أنا بقرأ بس ومبسمعش لـ حد، سمعت كتير ولكن مش مقتنعة بكل الحاجات، فيه ناس دلوقتي لطيفة زي الشيخ مصطفى حسني مريح وهادي وواعي، ممكن أكون أنا مش محجبة لكن أنا بحبه، بيديني إحساس السلام النفسي، علاقتنا بـ ربنا مش خناقة.

ولفتت لقاء الخميسي: فيه ناس بتضايق من آرائي وبيشتموني، لو أنت رافض فكرة تناقش أو أبعد، والناس بتشتم وتقول أنت متعرفيش ربنا، هل هما عارفين حياتي؟ أنا بعمل إيه في بيتي أو بدعي ربنا بقول إيه؟ حد دخل جوايا أنا صادقة ولا لأ؟ ربنا الوحيد اللي عارف الصدق من عدمه.

واختتمت: علاقتي بـ ربنا أحلى حاجة في الحياة، أنا راضية ومعايا زوج جميل راضي، وكل يوم الصبح بشكر ربنا على كل حاجة.