كشف المخرج مجدي الهواري عن نقطة التحول في حياة الفنان محمد رجب الفنية، التي تمت على يده.
وكتب الهواري عبر حسابه الشخصي بموقع التواصل الاجتماعي فيسبوك: “في يوم من الأيام وأنا بعمل فيلم الباشا تلميذ جالي محمد رجب، وقالي نفسي تغير نظرة الجمهور لي في أدوار الشر اللي بعملها”.
وأضاف: “اعترض محمد رجب على نوعية أدواره فمرة مغتصب، ومرة اتهجم ع البطلة، ودايما ضد البطل اللي بتحبه الناس!”.
وأشار الهواري أن رجب سأله سؤال استنكاري قائلا: “هل أنا هفضل طول حياتي كده مكروووه! شوف ياريس أنا هعمل الفيلم وهلعب الدور ده، لكن كان نفسي تشوفني في حاجة تانية غير دور الشرير ده”.
وتابع الهواري:” رجب كان نفسه يلعب دور حمزه اللي عمله رامز جلال، بصراحة صعب علي.. قولتله لا اعمل دور طارق كابو في #الفيلم ده وهنخليك تعمل حاجة صح يارجب! وسكت وسمع الكلام الصراحة. لكن فضل طول الفيلم يسألني مش هتنفذ وعدك لي.. أنا أقوله عيب ياحمادة أنا وعدتك تعمل حاجة صح!! يضحك ويسكت ويقولي ماشي أنا واثق فيك”.
وأضاف الهواري:”خلص الفيلم وهو في حالة يأس تماماً لدرجة إنه مابقاش حتي يسألني، لحد ماجيت في آخر مشهد قولتلهم هاتوا محمد رجب تصوير مشهد الفاينال، وجه فعلاً وهو والله مش عارف جاي ليه! في مشهد هو مش فيه أصلا!! وفجأة قولتله محمد إنت هتنزل من هنا وتضرب لبسيوني تعظيم سلام وتقوله: “حاولت أعمل حاجة صح”، ماكانش مصدق نفسه لأنه ده مش مكتوب في السيناريو ولا حد كان يعرف.. وكانت مفاجأة للجميع وللجمهور كمان إن يطلع طارق كابو هو اللي ساعد البطل”.
واستكمل:”مشهد فارق في حياة محمد رجب مع الناس إلى الآن.. و غير من بعدها جلده من شرير الفيلم لأدوار كلها طيبة وحنية، وبقي بطل كمان إلى الآن أفلام ومسلسلات كمان. من اصل المشهد ده ! سبحان الله عشان نيته حلوة، وتفوت الأيام وأعمل نفس الريأكشن في نهاية عرض مسرحية “ياما في الجراب ياحاوي”، وكأني بقول تاني بعد 16 سنة، حاولت أعمل حاجة صح”.
واختتم الهواري:”ان شاء الله تكون المسرحية علامة فارقة في cv كل من شارك فيها بالطاقة الجميلة اللي عند كل أبطالها ماشاء الله زي ما كان عند كل من شارك في #فيلم #الباشا_تلميذ ♥️”.
