مشهد الكبدة الأخطر وأسماء جلال تعرضت للإغماء.. صناع أشغال شقة يكشفون كواليس المسلسل مع شريف عامر

حل صناع مسلسل أشغال شقة ضيوف في برنامج يحدث في مصر، تقديم الإعلامي شريف عامر، وكشفوا عن كواليس المسلسل بعد النجاح الذي حققه في الموسم الرمضاني 2024.

وتحدث هشام ماجد عن كواليس مشهد الكبدة في المسلسل قائلًا: المشهد بالنسبة لي كان لطيف على الورق، لكن مكنتش متوقع أنه يكون من أفضل مشاهد المسلسل.

من ناحيته قال المخرج خالد دياب: مشهد خطر وصديق لي بيديني ملاحظات على السيناريو، قال لي شيل مشهد الكبدة ده خطر وممكن يقفل الناس من المسلسل، ولكن كان عندي إحساس إن المشهد ده ومشهد المقابر هيكونوا من أهم المشاهد.

أما عن مشهد المقابر فقال: حصل عليه مشكلة كبيرة وكنا بنفكر نلغيه لأنه كان ممكن يكون مشهد قاسي وما يضحكش وأستاذة إنعام كان عندها وجهة نظر أنه ممكن ميضحكش بصفة عامة

كما كشف المخرج خالد دياب كواليس مفاجأة عن مشهد حمل أسماء جلال من قبل عربي على كتفيه قائلًا: مشهد أسماء جلال انتهى بأنه اغمى عليها والوقعة دي بجد ومكملناش تصوير.

من ناحيتها قالت أسماء جلال: هو هبدني وأنا كنت دايخة وعنيا بدأت تروح وتيحي وهو شايلني وطالع بيا السلم، وفجأة قلت هيحسوا بيا وينزلني براحة، لكن فجاة راح هبدني على الأرض.

بدوره قال مصطفى غريب مازحًا: اللوكشين كله كان متوتر بعد إغماء أسماء جلال، ولقيت خالد بيقول المشهد حلو أوي.

وقالت أسماء جلال عن تقديمها مشاهد الحمل والرضاعة: في ناس كتير صحابي من التيم بيقولوا لي دي قصة حياتي وحصل معانا كده وفرحت لأن الناس بتربط المسلسل بحياتها.

وكشف خالد دياب سبب تركيبة حمدي وياسمين في المسلسل قائلًا: التركيبة بتاعة شخصية حمدي وياسمين الصح لها أنهم ما يتجوزوش لأن حمدي قديم في لبسه وشكله، وياسمين أكثر تحضرا وفاهمة يعني إيه تريند وهو مش عنده فيس بوك.

وأضاف: كان أهم حاجة بالنسبة لي أن ياسمين تكون قريبة من الناس لأن الناس مش بتحب كواليس صناعة السينما والإعلام وبتحب تشوف ناس شبهها ولو عملناها بشكل المذيعة وبتلبس إزاي في بيتها وعندها كام بدلة وأنها مهتمة بلسبها كانت الناس هتمل، ولكن كان لازم نقربها من الناس، من خلال أنها تكون في بيتها عادية وفي شغلها مش ناجحة بشكل كبير علشان ما يحتمش علينا اننا نطهرها بشكل المذيعة من منطق اننا نخليها شخصية طبيعية في بيتها.