أكد الإعلامي مصطفى بكري، أن الشعب المصري يحرص على دعم بلده في مختلف الأزمات، أن المصرين في وقت الجد بيتحركوا بجيناتهم عشان يكونوا مع البلد، بينسوا الجرح الخاص ويلتفوا حول القضية العامة.
وأضاف “بكري”، خلال تقديمه لبرنامج “حقائق وأسرار”، والمذاع عبر قناة صدى البلد، أن تاريخ مصر ملئ بأزمات كثيرة عايشها المصريون، فيه حلف موجود في البلد اسمه حلف إزاي تخرب البلد وتعمل احتقان مجتمعي، دايما الشعب هو الحامي لينا، الأنظمة بتروح وتيجي لكن مؤسسات الدولة العميقة هي التي حمت مصر من كل المؤامرات وآخرها مؤامرة جماعة الإخوان الإرهابية.
وأكد “بكري”، أن الشعب المصري واعي وعارف الصح وغلط، محدش هيزايد على الشعب المصري، اللي بيعاني، الدولة والرئيس عارفين إنه بيعاني، عشان دخلنا في إصلاحات اقتصادية كانت ضرورية وإلا كنا وقعنا”، وتابع:” كلنا وقفنا واخترنا الرئيس رغم إنه مكانش عايز، وأخد تكليف من الشعب إنه ينسينا الهم اللي عشناه سنين طويلة، فيه ناس في الحكومة بتنكد علينا حياتنا وبتصدر رئيس دولة في الواجهة”.
وتابع:” ازاي فيه حلف معين مهمته التكويش على كل شئ، القراءة الصحيحة للواقع تقول إنه لازم يكون فيه تعديل وتغيير في الحكومة، فيه ناس لازم تمشي ونسمع الشعب عايز يقول إيه، عشان بلدنا وعشان اللي حصل قبل كده ميتكررش، الرئيس قال قبل كده الناس لو خرجت هتهدم كل حاجة، الرئيس بيقرأ الواقع وشايفه، فيه حلف فساد وتحريض ووزراء واخدينها تكية، محتاجين من الرئيس ثورة على كل دول عشان مصر”.
وقال:”محدش هيزايد على موقفي ودعمي للرئيس والدولة، كل حاجة مش تمام، الشعب منسيش إن الرئيس السيسي خلصنا من الإخوان والظلم، والله لو مر يوم 4 يوليو كنا هندخل حرب أهلية”.
