العلم نور ولكن العلم ليس في الكتب فقط، نستطيع أخذ العلم من أي مكان و بأي وسيلة، فالتجارب علم والظروف علم وكل ما يمر به الإنسان علم.
اقرأ المزيد…بسنت عادل بطلة السوشيال ميديا.. استغلت إدارتها لأكثر من 40 جروب في تحقيق إنجازات إنسانية
إيمان الفقي درست آداب English وحصلت على ماجستير في TESOL من الجامعة الأمريكية في حديث مع الحكاية تحدثنا عن فكرة جروب “معلومه على الماشي “.
قالت إيمان:” طول عمري بحب القراية والكتابة جدا و دايما كنت بكتب على بروفايلي الشخصي مثلا book reviews لما بخلصها ، لحد لما فكرت في فكرة إني أعمل جروب يكون غير ربحي اكتب فيه بلغة سهلة و مفهومة و مش معقدة و ممكن أي حد مهما كان سنه يفهم اللي مكتوب “.
وأضافت :” كان مثلا عندي أصدقاء مش بيحبوا يقروا خالص عشان بيزهقوا بسرعة و بيملوا من الكتب الطويلة ، فقولت لنفسي ليه الكتب اللي بقراها لما الاقي فيها معلومة لطيفة ماكتبهاش و ادور على صورة تليق مع الكلام و احط المعلومات دي في جروب و تكون المعلومة بالعامية و تكون بالمختصر المفيد و من هنا جيه الاسم معلومة ع الماشي”.
واكملت :” انا بحب دايما اعمل الحاجة على اكمل وجه يعني سبحان الله في شخصيتي حتى لازم كل حاجة تكون perfect وده اللي خلاني بتعامل مع الجروب باهتمام رهيب و حب و خوف عليه ولا كانه حد من اولادي.”.
و استطردت إيمان قائلة:” لازم اتاكد من المصادر و اللغة اللي مكتوب بيها البوست .. مايكونش في أخطاء املائية او لغوية مثلا.. دايما بحاول احافظ على حقوق الملكية الفكرية مثلا بتاعت اي معلوكة هتتاخد بشكل مباشر من حد”.
و قالت :” الاول كنت بكتب في الجروب لوحدي و بعدين واحدة واحدة أصحابي اللي عندهم شغف بالقراية و الكتابة زيي بدأوا يشاركوا ، لحد لما شوية شوية بدأ الجروب يبقى فيه أكتر من حد حابب يشارك بشكل دوري ”
ووضحت:” الدعم اللي اخدته للجروب كان معنوي من كل اللي في دايرة معارفي .. يعني دايما في تشجيع لما بوست بيتكتب حلو و الاقي اصحابي باعتنلي على الماسنجر رسالة مثلا بانهم الجروب بقى حاجة اساسية في يومهم مثلا . . او ان حد معرفوش اصلا الاقيه باعتلي ان الجروب جميل اوي لدرجة انه بقى يفيده في المدرسة عشان بياخد منه افكار للاذاعة المدرسية مثلا “.
وقالت :” لا عملت دعاية و لا دفعت فلوس خالص و دي حاجة انا مبسوطة بيها جداً انه بيكبر بالناس اللي بتتابعه و الحمد لله دلوقتي اهو بقينا ٤٧ الف”.
وتحدثت إيمان عن الصعوبات قائلة:” الصعوبات اللي بتواجهني ان موضوع الريتش اللي بيقع و ده بسبب سياسات الفايسبوك مثلا بتخلي البوستات ما توصلش خاالص لعدد كبير من اعضاء الجروب وده ممكن يسبب احباط ان بعد كل البحث و القراية و ساعات كمان الترجمة لاني ساعات كتير بترجم مقالات، تلاقي البوست وقع و ما تشافش… و حاجة بردو بتضايقني اوي اني الاقي جروبات تانية او اشخلص سارقين البوست بمعنى انهم واخدين الكلام و ناسبينه ليهم و ده مجهودي الشخصي سواء في القراية و الكتابة و البحث عن الصور “.
وقالت: “في النهاية انا احتسبته زكاة علم عشان مش ازعل و بطلت افضل ابعت للي اخد البوست و اقول عيب و ما يصحش لان في الاول و الاخر دي بترجع لضمير و مبادئ اللي قدامك”.
و أنهت إيمان حديثها قائلة:” انا نفسي الجروب يوصل لاكبر عدد من الناس اللي بتحب القراية بره مصر و الحمد لله انا عندي اعضاء من دول عربية كتير و عرب عايشين في دول اوروبية كتير و بقيت عارفاهم بالاسم من كتر ما بقيت احس ان الجروب بقى عيلة واحدة كبيرة … نسيت كمان اقولك اني مقسمة الجروب لموضوعات زي التاريخ و علم النفس و العلوم و الفن و المواهب و حاجات كتير تقدري تطلعي عليه.. و بعتز اوي اوي باني عاملة sectionخاص للمواهب اللي بشوفها صدفة و بعرض حاجتها عشان اعرف الناس بيها و كل ده من غير اي فلوس خالص يعني مش باخد منهم خالص اي حاجة لاني قولتلك قبل كده ان الجروب مش ربحي ولا فيه دعاية خالص.
موضوعات ذات صلة:
عمر إسماعيل صاحب فكرة جروب Trendat couple: تمت من خلال الجروب 111 خطوبة
صاحب جروب busted minds للحكاية: هدفي رسم الضحكة على وجوه الأعضاء
أدمن جروب “مياوهات”: هدفنا نشر كل ما يخص القطط
