قالت الفنانة يسرا خلال ندوتها التي أُقيمت منذ قليل، ضمن فعاليات مهرجان الجونة السينمائي بدورته السادسة: مش بتدخل في السيناريو في كل الأحوال، بس في المسلسلات بتدخل، والفرق إن الفيلم مدته ساعتين والدنيا واضحة وصريحة فيه، لكن في المسلسلات لازم تخدمي على كل الشخصيات وتديهم أدوار حلوة يبانوا فيها، المسلسل بيكون 13 ساعة فلازم تفرشي كل الشخصيات دي.
وتطرقت يسرا للحديث عن المخرج الراحل يوسف شاهين باعتباره من الأساتذة الذين أثروا فيها خلال مشوارها وقالت خلال الماستر كلاس الخاصة بها والمقامة ضمن فعاليات مهرجان الجونة السينمائى: “يوسف شاهين أول مرة قابلته قلت له مش هعرف أشتغل معاك علشان خفت من الفشل وانه هيكون ليه أثر كبير عليا”
وأضافت يسرا :”يوسف شاهين طلب منى أغير لون شعرى من البلوند إلى الأسود فرديت عليه انى هبقى وحشة، ولكنه صمم، ولما ادانى “ورق حدوتة مصرية” قريته 10 مرات مفهمتوش خالص، وهو الأول كان عارض عليا الأول دور الأخت وأنان قلت له إنى عاوزة دور مراته ورحت معتذرة له وعملت حاجات علشان يكرهنى وميكلمنيش تانى”.
وتابعت يسرا:”بعد 3 شهور وانا كنت قاعدة عند خالتى ونايمة لقيت واحد داخل عليا (يوسف شاهين) الأوضة وبيصحينى فجأة ويقولى قومى علشان عندنا تصوير الفيلم، والبسى عقبال ما أعملك القهوة، وكمان فتح الدولاب ونقى كل اللبس بتاع الشخصية فى الفيلم وقلت له حاضر يا أستاذ وعملت الفيلم بنفس الملابس اللى اختارها”.
