نفت الفنانة انتصار، أن يكون إبعادها من برنامج “نفسنة” الذي كانت تقدمه مع الفنانتين هيدي كرم وشيماء سيف، بسبب ذلة لسان، وتحديدا قولها “أنا النجمة هنا”، مؤكدةً: “التعالي مش من صفاتي، أنا بقالي كتير بشتغل، أنا طيبة جدا”.
وأضافت “انتصار”، خلال حوارها مع الإعلامية بسمة وهبة مقدمة برنامج “العرافة”، على قناة “المحور”، “ولما أقول أنا النجمة هنا ده حقي، أنا قلت أنا النجمة، الناس بتستغرب ليه لما أقول أصل أنا الجامدة أوي، أصل أنا الحلوة أوي وأهم كوميديانة في مصر، الناس مستكترة عليّ ليه اللي أنا فيه”، وتابعت:” هو أنا أفضل أشتغل 20 سنة ولما آجي أقول أنا مشهورة يتقال إني متعالية؟! انا مشهورة، اللي مش عاجبه إني مشهورة يضرب راسه في الحائط”.
وتابعت: “ممشتش من البرنامج بدليل إني كملت بعد كده، لكن أنا مشيت لأن عندي مسلسلات كتير وبما إني أنا النجمة فأنا أكتر واحدة بشتغل في السوق، مسلسلات وأفلام ومسرحيات، الضغط عالي جدا، ومفيش تعاون من القناة في تنظيم أيام التسجيل .. ويسجل 3 أيام كل 15 يوم، ولما يكون عندي مسرحية في إسكندرية ومسلسل، يبقى نتعاون مع بعض شوية، سجلوا مع حد غيري أنا قابلة تجيبوا حد تاني لحد ما أشوف شغلي في الإسكندرية، رفضوا كل حلولي، وشعرت بالتعنت، ومع شوية هيصة، وعند أول تلكيكة خلعت”.
كما تحدثت الفنانة انتصار عن سر ترك برنامج “نفسنة” الذي كانت تقدمه مع الفنانتين هيدي كرم وشيماء سيف على قناة القاهرة والناس، قائلة: “فهموا النفسنة غلط، بتكلم عن القناة، كانوا عاوزين يخلوا النفسنة بين الممثلين بجد، لأنهم لُطاف وجمال، وقالوا عاوزين نعمل تسجيل بين الحلقات ونعمل بجد نفسنة”.
وتابعت:”رفضت هذا الأمر، فبدأوا يضغطوا على الكلام ده واختاروا أضعف عنصر، القناة كانت عاوزانا نظهر إن في نفسنة بيننا، لكن مكنوش عارفين، لأني كنت طبيعية وجميلة ولطيفة ومحدش عملي حاجة”.
