أكد الكابتن عصام الحضري مدرب حراس مرمى المنتخب الوطني، أنه لم يتوقع ان يعيش الفريق أجواء مثل التي عاشها في السنغال ضمن التصفيات الأفريقية المؤهلة إلى كأس العالم.
وأضاف الحضري، خلال حلقة اليوم من برنامج “العرافة”، على قناة المحور، من تقديم الإعلامية بسمة وهبة: “مكناش متوقعين إن الأجواء تبقى بالطريقة دي، كلاعبين ومسؤولين وجهاز فني مكناش متوقعين إننا نشوف اللي شفناه ده من أول ما دخلنا المطار..أول ما وصلنا البلد اتشتمنا شتايم مش كويسة بالفرنساوي، متوقعناش إنهم يستقبلونا كده، لأننا استقبلناهم كويس في مصر، لكن ده محصلناش هناك، رحنا الماتش من فندق الإقامة للملعب في ساعتين، وده عمره ما حصل، رحنا قبل الماتش بساعة .. طب نسخن امتى؟! أنا لعبت في أفريقيا كتير، بس اللي شفته في السنغال مش كده”.
وفى سياق آخر قال “الحضرى”، إن لاعبي المنتخب السنغالي يلعبون في أفضل أندية على مستوى قارة أوروبا مثل بايرن ميونخ وباريس سان جيرمان وتشيلسي ونابولي، موضحًا: “لعبنا في أجواء كلها ضغط عصبي وشحن جماهيري وليزر”.
وتحدث” الحضرى”، عن مباراة إياب الدور المؤهل إلى كأس العالم في السنغال: “كان معانا 23 لاعب، يعني 23 عقلية منعرفش بيفكروا ازاي، كل لاعب وله عقليته ..ضربات الجزاء حظ، ممكن أصد خمسة وممكن مصدش واحدة، وبالنسبة لمحمد صلاح، ففي نهائي أفريقيا، قالوا إن ازواي صلاح ميشوطش ويشوط الخامسة، ولما شاط أول واحدة قالوا غيرتوا ليه؟!”.
وتابع “الحضرى”، : “مكناش عارفين نخرج بعد الماتش بساعتين وربع، الجمهور خلص احتفال مع اللاعبين ودخلوا الممر، وكنا زعلانين والدكتور أشرف صبحي اتكلم مع اللاعبين، واللي كان بيعيط وزعلان وكان متعصب، واتكلم معانا في إنه يعتزل، قال ميقدرش يقولنا دلوقتي، لأننا كنا في وقت هزيمة وممكن يطلع أي حاجة”.
