عبر المطرب الشعبي رضا البحراوي، عن استيائه الشديد من اعتماد منتقدي فنه وأسلوب غنائه، على التجريح به وتوجيه إهانات له ولعائلته، خاصة بعد لقائه الأخير مع “صاحبة السعادة”.
وقال البحراوي، عبر صفحته الرسمية على موقع الصور الشهير “انستجرام”:”أولاً، ربنا كبير جداً، وثانياً، أشكر كل جمهوري الذي وقف بجانبي في كل النجاحات، وأدعو الله أن يبعد عني الناس المرضى والأشخاص الذين لا يحبون الخير للآخرين”.
وأضاف: “سيبوني بقا في حالي عشان انا والله والله تعبت في الشغلانة دى أوى، خليكوا في حالكو و سيبو الملك للمالك وشيل عينك عني”.
وتابع “هسيب جمهورى واخواتى هنا الي يردو، وطول ما انا في نجاح عمرك ما هاترتاح”.
وكان قد تصدر لقاء الفنان رضا البحراوي، مع الفنانة القديرة إسعاد يونس في برنامجها صاحبة السعادة المذاع عبر شاشة قناة DMC، التريند خلال الساعات الماضية وذلك بعدما استضافته ضمن احتفالات ليلة عيد الأضحى المبارك.
أبرز تصريحات رضا البحراوي
وخلال اللقاء أعرب “البحراوي”، عن إمتنانه الكبير لعائلته، قائلًا:”أبويا وأمي ليهم فضل كبير عليا ومقدرش أنسى تعب حد فبهم معايا”.
وأوضح “البحراوي”، أنه تعرض لصعوبات كبيرة حتى وصل للنجاح الكبير الذي حققه الفترة الماضية، قائلًا:”أول فرح دخلته في الإسماعيلية الناس شالوني وأبويا عيط، ولما نزلت من الفقرة ربنا كرمني وفتح عليا”.
اقرأ أيضا.. بالصور.. شاهد عيان يكشف لـ الحكاية ملابسات وأسباب حادث القبطان المفقود بعد غرق المركب
وأضاف:”أنا اشتغلت حاجات كتير ومطلعتش بالساهل، والدي ووالدتي على قد حالهم، وأي حاجة في الدنيا أعملها عشان أمي”.
تصريحات رضا البحراوي
وأكد “البحراوي”، خلال اللقاء، إنه يسعى جاهدًا لرضا الله – سبحانه وتعالى، قائلًا:”أنا براعي ربنا في كل حاجة وطالما رضيت أهلي وإخواتي ربنا هيكرمني”.
وتابع:”يعني أمي وبعدين أبويا وبعدين إخواتي وبعدين مراتي وبعدين عيالي، وكل يوم لازم وأنا رايح الشغل أعدي على أمي تدعيلي، وتزعل لو معدتش عليها وساعات تضحك عليا وتقول أنها تعبانة عشان أروح، هي حياتي كلها “.
وأكد، أنه بدأ الغناء منذ عمر الـ 8 سنوات، كما أعرب عن حبه الشديد لعائلته وبالأخص والدته، قائلًا:”أنا بدأت أغني وأنا عندي 8 سنين، وغنيت في الشارع ومكنتش حاسس إن صوتي حلو، ومنتج شافني وقالي صوتك حلو، وأول مرة شافني كنت بلعب بلي في الشارع وعدى عليا وغنيت وإداني 10 جنيه، وطبعا الحالة المادية كانت على قدها والحمد لله طارق عبد الستار عملي شريط وقبل ما أعمل الشريط كنت بغني في الحنن والأفراح”.
واستكمل:” كنت بغني لرمضان البرنس وجورج وسوف، وكنت بقول نفسي أوصل أبقى زي رمضان البرنس، والشريط نزل ساعة مولد السيد البدوي”.
واختتم حديثه قائلًا:”وبعد أسبوع جالي حد من إسماعيلية وخبط على الشباك وأمي قالتله أنت عايز رضا ليه؟ وهي متعرفش إني بغني، والراجل سابلها بطاقته وقالها هرجعهولك تاني، وأول أجر أخده كان 300 جنيه”.
علاقته بمحمد إمام
وفي سياق متصل، تحدث “البحراوي”، عن علاقته بالفنان محمد عادل إمام، قائلًا:”ممتن جدًا لمحمد عادل إمام وهو فنان كبير، ووقف جنبي في هوجان والنمر”.
وأضاف:”كنت بترشح لأعمال كتير قبل هوجان والنمر لكن قطاعين الأرزاق كانوا كتير، وممكن أكون مخلص الأغنية وحد تاني يقوم عارض فلوس وياخد المكان، وحصلت لي مرتين منهم مسلسل كبير أوي ومكنش فيه نصيب”.
وتابع:”وأنا في الطريق من طنطا لاقيت النجم بطل المسلسل الكبير بيقولي بلح وفركش ومفيش نصيب، فقُلت حسبي الله ونعم الوكيل ورجعت طنطا تاني، بعد الموقف ده لاقيت مدير أعمال الفنان محمد عادل إمام بيكلمني وقالي الأستاذ عايز يقعد معاك في هوجان، وبيديني تتر بداية ونهاية وغنويتن في المسلسل، قومت ساجد على الأرض وقولت الحمد لله وربنا عايز كده، مسبنيش بعد كده، وقالي مش هسيبك عشان إنتا إتظلمت كتير».
واستكمل:”جالي مسلسلات كتير أوي لازم استأذن منه الأول، وأشاوره، ويقولي ده لا وده آه، وهو محترم جدًا وقبل ما أروحله كان حاببني أوي وبيسمعني، وبقوله كفاية أدبك واحترامك وإنصافك لي قدام الناس”.
