كَتبت: أوركيد سامي
ساهم التطور الكبير الذي شهدته الحياة إلى أن يكون السفر أمراً أساسياً، ونمطاً معروفاً في حياة الكثير من الناس، وذلك تبعاً لحاجاتهم في مجالات الحياة المختلفة ومنها: العلاج، والترفيه، والعمل وغيرها.
الرحالة “نهله عوض ” تُوجِه بعض النصائح للسفر بأقل تكلفة.
أهم حاجة وبداية كل حاجة هي حجز الطيران.. لازم يكون بفترة كبيرة قبل السفر على الأقل شهرين لأن كل ما بنقرب من معاد السفر التذاكر بتغلى. و من أفضل المواقع إللي بتساعدنا في الحجز بأقل تكلفة “sky scanner”.
لما بنسافر مش لازم نقعد في فنادق لكن ممكن نقعد في “هوستل” (بيت شباب)، الغرفة ممكن يكون فيها أربع أفراد أو أكتر حسب ما بنختار وحسب الميزانية.
وفي كمان حاجة اسمها “couchsurfing” ودة أبليكشن بيعرض بيوت العائلات إللي في كل بلد بنسافرلها إللي ممكن يستضيفوا الناس مجاناً وطبعا بنقرأ تقييمات الناس إللي قبْلنا عنها كويس ولازم يكون في تقييمات كتير عن العيلة دي والبيت ده ويكون كمان “verified” من الموقع نفسه لزيادة الاطمئنان.
ومن الحاجات إللي بتوفر جداً في السفر إنك تعيش زي أهل البلد مش كسائح يعني مثلاً مش لازم ناكل في المطاعم السياحية و إللي حوالين المزارات السياحية لكن ممكن ناكل في المطاعم المحلية إللي أهل البلد بياكلوا منها ومش لازم نركب تاكسي أو أوبر لو البلد غالية لكن ممكن نعمل بحث كويس قبل السفر عن مواصلات البلد دى ونتنقل بأُتوبيسات عامة.
في كمان داخل آسيا طيران اسمه “air Asia” ودة تذكرته بتبقى رخيصة جداً جداً بين الدول الآسيوية وخصوصاً لو مش معايا شنطة كبيرة ، يعني لو الشنطة ٧ أو ٨ كيلو فقط بنطلع بيها الطيارة ومايكونش معانا غيرها وساعتها التذكرة ممكن تبقى ب ٢٠ دولار ل ٣٠ أو ٤٠ ، لكن لو في شنطة كبيرة بتتشحن ممكن يدفع عليها لوحدها ٢٠ أو ٣٠ دولار، وه معناه إن لو سافرنا خُفاف بشنطة واحدة هنوفر كتير جداً خصوصاً لو بنتنقل بين كذا دولة آسيوية.
ولو دولة غالية في المواصلات أو مواصلاتها قليلة ومافيهاش مترو زي لبنان ممكن نتحرك مع ناس من الهوستل وساعتها تكلفة التاكسي إللي هايقضي معانا اليوم بتتقسم على ٣ أو ٤ أفراد ودة بيوفر كتير. في أغلب الهوستلز في العالم بيبقى فيه “free tour” ودي بتبقى جولة بينظمها الناس المسؤلين عن الهوستل لمشاهدة أهم المعالم القريبة من الهوستل في المدينة.
