خرجت الفنانة شيرين عبدالوهاب عن صمتها بعد مرور مايزيد عن 24ساعة على التسريبات الصوتية المنسوبة لوالد زوجها حسام حبيب، وحرصت على الرد من خلال تسجيل صوتي على جزئين، في الجزء الأول قالت شيرين:” عاوزة أطمن كل الناس على صحتي، أنا صحتى كويسة وحسام زوجي انسان من أنضف الرجال في الدنيا، ومتربي جدا وبيحبني أكتر من نفسه، وميستاهلش منكم كل القساوة دي لان انتوا متعرفهوش، لكن أنا عذراكم”.
وتابعت” حسام بنالي شخصيتي، ورجعلي ثقتي بنفسي، وبيحبني أنا وبناتي، ومن ساعة مااتجوزني مستفدش مني ولا عمل أي حاجه لنفسه، مضيفة:” حماتي ست نضيفة وعظيمة وحسام انسان عظيم، ادعولي أنا وهو بالذرية الصالحة لأنه انسان نقي”.
لم تكتف شيرين بجزء واحد للرد على الأزمة الأخيرة وانما استكملت ردها بجزء ثاني من التسجيل الصوتي وبصوت يسيطر عليه الحزن المكتوم وقال:” الفيزا بتاعتي مش معاه، وكل الكلام مش مظبوط لأني كلي كده بتاعته، جوزي راجل من عيلة محترمة أوي ومقبلش ان حد يتكلم عليه، ولا على والدته، بقالنا 4سنين متجوزين، وكفاية أنه طلع من حياتي كل التعابين اللي بتستغلني”.
ومن جانبه رد السيد حسين حبيب والد زوجها المطرب حسام حبيب بعد تسريبات الأمس للمرة الثانية وقال:” دي مجلة صفرا وبتقوم على الفضايح وكلام مفبرك جدا، وباين جدا من طريقة الأسئلة والردود، ولو ليهم فرع في القاهرة هقاضيهم “.
يذكر أن رواد مواقع التواصل الاجتماعي كانوا قد تفاعلوا بالأمس مع تسريب صوتي لوالد حسام حبيب تحدث فيه عن نجله حسام المتزوج من شيرين التي تكبره بشهور ورغبته في وجود حفيد ونيته في زواج ابنه من فتاة أصغر منه بسبب عدم قدرة شيرين على الانجاب، واعترافه بأن حسام ابنه ” دماغه سم” وتزوج من شيرين من أجل المال فقط.
