حلت الفنانة منة شلبي ضيفة في برنامج “سهرانين” مع الفنان أمير كرارة، وكشفت منة شلبي كواليس لأول مرة عن فيلم “الساحر” الذي يعد إنطلاقتها الفنية في عام 2001.
قالت منة شلبي “أنا عذبتهم في تصوير فيلم الساحر، لأني مكنتش بعرف أمثل، وتمثيلي كان زي الزفت، لدرجة كنت بقف قدام أستاذ محمود عبدالعزيز وأقف ساكتة مقدرش أتكلم، ومكنتش بعرف أنطق وبتكلم في سري ومش فاهمة الكلام.. وكنت بخرج غلط من اللوكيشن”.
وأضافت منة شلبي: “أنا كنت كارثة في فيلم الساحر، وزمان كنت تخينة وبحب الأكل جدًا، وخسيت شوية فخدوني وخلاص بعدها رجعت تخنت تاني، لدرجة إن أستاذ رضوان الكاشف كان بيقولي هو أنا بصور فيل؟ وأنا كنت أقعد أعيط، وبالمناسبة أنا لسه بحب الأكل لحد دلوقتى بس هذبت نفسي”.
وتابعت منة شلبي: “أنا مكنتش مصدقة إن دوري كبير، لدرجة لما شفت السيناريو قولت لأستاذ رضوان، حضرتك متأكد إني بعمل دور نور”.
اقرأ أيضا.. منة شلبي تنفعل على أسما إبراهيم بسبب ريهام عبد الغفور
أما عن علاقتها بالراحل محمود عبد العزيز قالت منة شلبي “محمود عبدالعزيز أبويا وأستاذي، ومحمد وكريم إخواتي، وفي الحياة كان أكتر واحد أنا وأمي بنلجأ له، وهو وأولاده كانوا رجالة وإخواتي، وأول مرة أروح كاستنج محمد كان معايا وهو بالنسبالي أخويا، ومحمود عبد العزيز مخلفش بنات وبالنسبة له أنا كنت بنته، وأمي مأنجبتش غيري، علشان كدا أمي كانت تتعامل معاهم على إنهم أولادها”.
منة شلبي
وخلال لقائها في برنامج “سهرانين” مع الفنان أمير كرارة قالت منة شلبي إن علاقتها بهند صبري لم تكن جيدة في بداياتهما الفنية مضيفة “:مكنش لينا في بعض أوي، مكنش فيه خناق، بس مكنش فيه حب”.
وتابعت منة شلبي “طلعنا احنا الاتنين مع بعض كانت هي بتعمل فيلم مواطن ومخبر وحرامي ومذكرات مراهقة، وانا كنت بعمل الساحل وبحب السيما، وادوارنا كانت جريئة في الفترة دي”.
واستكملت منة شلبي “في الفترة اللى انطلقنا فيها انا وهند صبري كان يجي حد يخلينا نسخن علي بعض ويقولي دي متبحبكيش وانا اقول دي مبتحبنيش ازاي يعني ويقولها نفس القصة، وبعدين اشتغلنا مع بعض فيلم أحلى الأوقات، وكل واحدة فينا كانت كتفها كان عالي علي التانية، بس محترمين، وكان وسطنا أعظم حكم حكم ست البنات حنان ترك”.
وتابعت:”برغم اني انا وهند صبري مش قريبين من بعض بس كان فيه ود شديد صنعته حنان ترك لإنها كانت قريبة مننا احنا الاتنين”.
واختتمت :” خلص فيلم احلى الأوقات لا حرب ولا سلم ومفيش حاجة، وبعدين جالنا فيلم بنات وسط البلد، فالمخرج محمد خان كلمني فوافقت وقلت له مفيش مشكلة وروحنا نعمل بروفة قراءة عنده في البيت بالمعادي واحنا بنفتح النسخة بصيت لهند صبري وقلت لها فيه كلام عايزة اقولهولك وهي كمان قالت لي وانا كمان وعرفنا ان فيه شوية ناس استغلت شوية تفاهة وصنعوا المشكلة ما بيننا ولكن فيه احترام لرحلتنا وشقانا وتعبنا وجرأة في الأعمال عن حب شديد للشغلانة، وتفاهمنا وانتهى سوء التفاهم اللي بينا واتصافينا”.
موضوعات ذات صلة
انتشال حطـ.ـام الغواصة “تيتان” من قاع المحيط الأطلسي
