خرجت الإعلامية ياسمين عز عن صمتها، وعلقت على مطالبة شاب لخطيبته بقائمة الهدايا والخروجات خلال فترة خطبتهما وذلك بعد انفصالهما.
وقالت ياسمين عز خلال برنامج كلام الناس: الناس بقى لها كام يوم بتتكلم عن ورقة، لا يعلمون مصدرها ومدى صحتها ولا حقيقتها، ولا هي مفبركة أو لأ، ولا حاولوا يعرفوا ومعظم البنات بتكتب خطب عنها علشان الورقة دي على حد فهمهم بتقلل من الرجل وتقلل من كرمه وأخلاقه، وأنا بقول لك لأ لا الورقة ولا عشرة غيرها تقدر تنال من الرجل أو تقلل من احترامه.
وأضافت ياسمين عز: لو الورقة دي فيها حاجة ضد البنات كان اتعمل لها حذف وإلغاء من السوشيال ميديا، ولكن علشان راجل انتشرت، مبدأيا كده إيه اللي يثبت إن الورقة حقيقية، وهل في احتمالية يكون مصدرها واحدة ست عاوزة تشوه من سمعته.
وأردفت: الفرعون منبع الكرم واللي بنى الهرم ومصدر العطاء والحنان، مستحيل يطلب من واحدة 20 جنيه في لعبة العربيات المتصادمة دي عمرها ما كانت أخلاق الفرعون.
واستكملت: رابعًا نفترض إن الورقة حقيقية، طيب ما ممكن يكون الراجل من حقه يسترد الشبكة والهدايا اللي جابها، والمفروض البنت وأهلها من نفسهم يرجعوا الحاجات، لإنه جايب الهدايا دي للبنت اللي هيتجوزها، فهل اتجوزها لأ، يبقى نرجع له حاجته، كنت بسمع من ناس في أهل التخصص إن الراجل في فترة الخطوبة يباخد شبكته والهدايا وبعد كتب الكتاب الموضوع بالنص وبعد الدخلة ما يخدش حاجة.
