قالت الفنانة نشوى مصطفى إن الفن ليس له وطن، مستنكرة هجوم المتابعين عليها بعد مباركتها للزملاء المشاركين في مسلسل الثمانية من انتاج المستشار تركي ال الشيخ.
جاء ذلك بعدما كتبت عبر حسابها الشخصي بموقع الفيس بوك:” طيب اللي حيتجاوز فى اي كلام على صفحتى بعد اذنه حاعمل بلوك —- اخر بوست حاكتبه عن مسلسل الثمانية — انا اسمى نشوى مصطفى — ممثلة من ٣٠ سنة — مفيش حد سندنى ولا ادانى فرصة اكبر من اللي استحقها يعنى عملت اسمى بمجهودى من غير مساعدة من حد — عمرى ورا ضهرى مش قدامى — يعنى لاحاجامل ولا حنافق حد علشان يدينى فرصة تخللى الناس تعرفنى — مادياً الحمد لله مستورة وربنا يديم عليا فضله “.
وتابعت :”الهجوم عليا علشان باركت لزمايلى وعلشان قلت ان اي ممثل يتمنى يشتغل فى مسلسل الثمانية لانه فيه مخرج كبير ومؤلف مهم وانتاج عظيم — مش فاهمة ليه ؟؟؟؟ حاقول لكم انا ليه —- علشان باركت على مسلسل انتاج المستشار تركى الشيخ — انا لم اذكر اسمه فى البوست السابق علشان ماحدش يقول بتطبلى وبتنافقى وبتجاملى — ومع ذلك اتهمونى انى بطبل مع ان المسلسل خلاص ادواره كلها اتسكنت وبيتصور خلاااااااص”.
وأضافت:”ياجماعة الراجل عمل فى بلده نهضة ونقلة مرعبة وعظيمة فى المجال الفنى والترفيه — ايه المانع نستفيد منه فى الانتاج المصرى — لكن نتكلم بموضوعية بقى كده — المسلسل انتاج سعودى ولكن ٩٩ فى المية من العاملين فيه مصريين — فيه زميل واحد سعودى وزميل بحرينى — اللي معترضين ان المستشار ذكر انه صاحب الفكرة – الراجل قال انه اختار مؤلف مصرى يكتب معاه السيناريو والحوار — و قال انه اعتمد على فنيين اجانب فى الجرافيك والتصوير عملو اعمال عالمية — يعنى انتاجياً حيتصرف بشكل كبير جدا على عمل فني”.
واختتمت:”واحنا ليه نكره ان يكون فى عمل فنى مصرى متنفذ بشكل عالمى — ياجماعة نشجع مش نهاجم — ياجماعة الفن مالهوش وطن — يارب المنتجين تكتر يارب الاعمال الفنية تزيد يارب الفن يجمع مش يفرق يارب نتفرج الاول وبعدين ننتقد ونهاجم خلينا متحضرين بقى — والسلام عليكم ورحمة الله”.
